Бүгүн сэтинньи 8 күнүгэр Хорула нэһилиэгэр Ийэ декадатын чэрчитинэн Ньурба оройуонун, Марха кустатын нэһилиэктэрин дьахталларын кыттыылаах Надежный тыл - путь к Победе!
02:17
10.11.2024
Бүгүн сэтинньи 8 күнүгэр Хорула нэһилиэгэр Ийэ декадатын чэрчитинэн Ньурба оройуонун, Марха кустатын нэһилиэктэрин дьахталларын кыттыылаах “Надежный тыл - путь к Победе!” диэн ааттаах патриотическай тыыннаах автопробег бастакы сырыыта буолла.
Барыта холбоон 96 киһи кыттыыны ылла.
Тэрээһин Арассыыйа, Саха Өрөспүүбүлүкэтин, Ньурба оройуонун Өрөгөй ырыатынан саҕаланна. Үөрүүлээх аһыллыыны “Алгыс” үҥкүү бөлөҕө Чороонноох үҥкүүнэн киэргэттилэр.
Киирии тылынан "Хорула нэһилиэгэ" муниципальнай тэриллии баһылыга Иванов Тимофей Алексеевич эҕэрдэ тылынан саҕалаата, салҕыы Ньурба улууһун дьокутааттарын сэбиэтин бэрэссэдээтэлэ, Ньурба оройуонун Дьахтар түмсүүтүн бэрэссэдээтэлэ Михайлова Нюргуяна Михайловна антифашисткай форумҥа кыттыытын туһунан кэпсээтэ, кэлбит түмсүүлэри кытта билиһиннэрдэ: ол курдук “Ньурба ньургуһуннара” - анал байыаннай дьайыы кэргэттэрин түмсүүтэ, “Көмүскэл” - волонтерскай иис сыаҕа, “Айли» - дьахтар кулууба, «мфц»специалистара, страховка консультана, Акана, Таркаайы, Үөдэй, Хаҥалас нэһилиэктэриттэн кэлбиттэрин сырдатта.
Ньурба оройуонун баһылыгын бырайыактары салайыыга уонна уопсастыбаны кытта сибээскэ солбуйааччы, Ньурба улууһун ыччат бэлиитикэтин салайааччыта Владимирова Валерия Гаврильевна дьахтар кэмитиэтэ кыайыыга кынаттыырын бэлиэтээтэ, санаатын үллэһиннэ.
Салҕыы Хорула нэһилиэгин дьахтар түмсүүтүн бэрэссэдээтэлэ Степанова Наталья Валерьевна түмсүүтүгэр 144 кэрэ аҥар баарын туһунан кэпсээтэ уонна Нюргуяна Михайловнаҕа 26 400 суммалаах анал байыаннай дьайыыга сылдьар уолаттарга Хорула дьахталларын кэмитиэтэ хомуйбут кылааттарын туттарда. Ону тэҥэ кэмитиэт Логотип күрэҕин түмүгүнэн Сайаана Акимовнаҕа махтал сурук, сэмэй бэлэх туттарда.
«Единая Россия» партия тэрийэр «Письмо папе», «Письмо солдату» акцияҕа кыттан Хорула орто оскуолатын лидерын солбуйааччыта Лилиана Томская туттарда, ону тэҥэ Акана, Таркаайы, Хаҥалас, Үөдэй нэһилиэктэрин оҕолорун суругун туттардылар.
Анал байыаннай дьайыыга сылдьар уолаттар кэргэттэрэ, төрөппүттэрэ, оҕолоро профессиональнай хаартыскаҕа түстүлэр.
Нэһилиэк администрациятын, дьахтар кэмитиэтэ кыттыылаах тотоойу эбиэт бэлэмнээннэр 19 700 эбии анал байыаннай дьайыыга кылааттарын киллэрдилэр.
«КөмүсКэл» иистэнэр сыах салайааччыта Галина Дмитриевна уолаттарга таҥас, спальнай мешок тигиитигэр, сетка тиһээһинигэр маастар кылаастары ыытта.
Кытыаннаах чүмэчи оҥорууга маастар кылаас, экологическай ыраас бородууктанан чүмэчи оҥорорго Алексеева Туяра Михайловна ыытта.
Талисман «Белый мишка» маастар кылааһын Виктория оҕолордуун илиилэрин сылааһынан харысхаллары оҥорорго үөрэттэ.
Донбасс оҕолоругар кинигэ хомуйуутун акцията ыытылынна, онно Саха Сирин туһунан кинигэлэр эмиэ бааллар Россия саҥа регионун оҕолоро Саха сирин туһунан билиилэрэ кэҥииригэр туһалыаҕа диэн. Манна кэлбит хас да нэһилиэк библиотеката кыттыыны ылла.
Маны сэргэ тэрээһин чэрчитинэн АБДь дьиэ кэргэттэригэр баран хаар күрдьэн күүс-көмө буоллулар.
«Ньурба Ньургуһуннара» хайдах тэриллибитин, анал байыаннай дьайыы кэргэттэрин, ийэлэрин туспа түмсүүлэрэ наадатын, психологтар оруолларын туһунан Варвара Георгиевна кэпсээтэ, видеороликтары көрдөрдө.
Түмүккэ «Хорула нэһилиэгэ» муниципальнай тэриллии баһылыга долгуйан туран махталын биллэрдэ, бүгүҥҥү тэрээһиҥҥэ уопсайа 46 100 АБДь фондатыгар киирбитин иһитиннэрдэ уонна чахчы дьахтар кэмитиэттэрин хамсааһына олус наадалааҕын, суолталааҕын бэлиэтээтэ.
Нюргуяна Михайловна Хорула нэһилиэгин баһылыгар, бары кыттыылаахтарга истиҥ махталын биллэрдэ. Биир сомоҕо буолан салҕыы тутуспутунан оройуоммут туһугар үлэлиэххэ диэн ыҥырда.
✍️Хорула нэһилиэгэ
