Ньурба к. отчуокка 220 киһи, тус көрсүһүүгэ араас боппуруостаах 4 киһи сырытта

Ньурба к. отчуокка 220 киһи, тус көрсүһүүгэ араас боппуруостаах 4 киһи сырытта.

Ньурбаҕа хараҕы аппаратнай эмтээһин туһунан ыйыталлар. Ньурбатааҕы поликлиникаҕа офтальмологическай кабинет Дьокуускайдааҕы харах балыыһатын филиалын быһыытынан үлэлиир, улуустааҕы киин балыыһа кабинеты оборудованиенан уонна быраастарынан ситэри хааччыйарга эбэтэр офтальмологическай кабинеты ЦРБ-га биэрэн үлэлэтэргэ туруорсар. Улуус баһылыга Алексей Иннокентьев социальнай боппуруостарга солбуйааччыта Наталия Петроваҕа ЦРБ-ны кытта манна үлэлэһэригэр, СӨ ситэриилээх былааһын отчуотугар боппуруоһу туруорсарга эттэ.

СВО буойуттарыгар, кинилэр дьиэ кэргэттэригэр көмө уонна сыһыан туһунан этэллэр. Сүтүктээх дьон аһыытын, кыһалҕатын бары өйдүөх уонна кинилэргэ бастакы уочарат бары көмө оҥоһулларыгар кыһаныах кэриҥнээхпит. Тэрээһиннэри патриотическай хабааннаахтык ыытыллыахтаах, бу сэрии саҕана олунньуга Ньурбаҕа былааннаммыт өрөспүүбүлүкэтээҕи "Кыайыы оһуокайа" тохтотуллар.

Ыраах Убайаан олохтоохторо В.Потапова уул. оҥоһуллуутун, сайыҥҥы уу ситимэ тардыллыытын туһунан ыйыттылар. Ньурба куорат салалтатын кытта суол боппуруоһугар сүбэлэһиэхпит диэтэ улуус баһылыга.

Убайааҥҥа киирбит уу ситимэ федеральнай суолу туоруура уустуктардаах, ол эрээри альтернативнай ньыма быһыытынан өрүстэн пляжка барар суолунан кыйа тардыы боппуруоһа үөрэтиллэр, бу кэлин олоххо киириэҕэ диэтэ куорат баһылыгын солбуйааччыта Павел Необутов.

Убайаан модельнай бибилэтиэкэтин Интэриниэтин уонна дьиэтин өрөмүөнүн туһунан ыйытыктар киирдилэр. Интэриниэти улуустааҕы киин бибилэтиэкэ үбүн быһааран холбуоҕа, точка доступа баар. Оттон дьиэтин өрөмүөнэ былааҥҥа киллэриллиэҕэ.

Итини таһынан Куоначчаан муостатын, ынах төбөтүгэр субсидия, Убайаан спорт саалатын туһунан уо.д.а. боппуруостар киирэн хоруйданнылар.

Геннадий Антонов

@gazetanyurba [club197321747|@ulusmedia]