Ньурба оройуонуттан Третьяковтар-Егоровтар медицинскэй династиялара республика бастыҥ үлэ династияларын Бочуот кинигэтигэр киллэрилиннэ
Муус устар 28 күнүгэр, үлэ харыстабылын аан дойдутааҕы күнүгэр, Саха сирин правительствотын, профсоюзтар уонна үлэ биэрээччилэр икки ардыларыгар үс өрүттээх сөбүлэһии түһэрсилиннэ. Кэлиҥҥи үс сылга бөдөҥ предприятиелар уонна кинилэр үлэһиттэригэр социальнай-үлэ сыһыанын сүрүннүүр, хардарыта эбэһээтэлистибэлэр ыйыллыбыттара. Маны сэргэ тэрээһиҥҥэ республика уон бастыҥ үлэ династияларын бэлиэтээтилэр. Ол иһигэр
республика бастыҥ үлэ династияларын Бочуот кинигэтигэр киллэриллибит үлэ династиялара Ньурба оройуонуттан Третьяковтар-Егоровтар династиялара эмиэ бааллар.
Марина Герасимова – Дьиикимдэтээ5и фельдшерскай пуун сэбиэдиссэйэ:
«Биһиги династия Саха сиригэр Үлэ сылыгар доруобуйа харыстабылын эйгэтигэр уопсайа 257 сыл ыстаастаах маннык чиэскэ тигистибит. 2015 сыллаахха Доруобуйа харыстабылын үлэһиттэрин күнүгэр Дьокуускай куоракка окружной администрацияҕа медицинскай династиялары эҕэрдэлээбиттэрэ, сертификат туттартаабыттара, онтон быйыл Бочуоттаах кинигэҕэ киирэр чиэскэ тигистибит.
Кыратык биһиги династияны кэпсиир буоллахха, династиябыт саҕалааччыта мин эбээм Третьякова Акулина Васильевна буолар, кини 1944 сыллаахха кылгас медицинскай сиэстэрэлэри үөрэтэр курска үөрэнэн бүтэрэн, 1945-1947 сылларга Куочай оҕо дьиэтигэр, онтон 1947 сылтан бочуоттаах сынньалаҥар тахсыар дылы Малышок дьааһылаҕа үлэлээбитэ. Үлэ уонна тыыл ветерана. Кини оҕолоругар холобур буолан, кыргыттара Мария Михайловна уонна Маргарита Михайловна ийэлэрин идэтин салҕаабыттара. Мария Михайловна 1956 сыллаахха кылгас курсу бүтэрэн Антоновка сытар балыыһатыгар бочуоттаах сынньалаҥар тахсыар дылы 44 сыл процедурнай медсиэстэрэнэн үлэлээбитэ. Бочуотунай грамоталарынан наҕараадаламмыта, нэһилиэк общественнай олоҕор кыттара, кэрэ куолаһынан нэһилиэк кэнсиэртэрин элбэхтик киэргэппитэ. Маргарита Михайловна Дьокуускайдааҕы медицинскэй институту бүтэрэн 1975 сылтан билигин да фтизиатр бырааһынан үлэлии сылдьар. РФ уонна СӨ Дорубоуйа харыстабылын туйгуна.
Үһүс көлүөнэҕэ Мария Михайловна уонна Маргарита Михайловна кыргыттара династияны салҕаан үлэлии сылдьаллар. Евдокия Николаевна Красноярскай медицинскай училищены бүтэрэн лаборанынан СЭСкэ үлэлээбитэ, билигин РЭСкэ үлэлии сылдьар. Мин, Герасимова Марина Фрументьевна, 1995 сыллаахха Дьокуускайдааҕы медицинскэй училищены бүтэрэн, үлэлээбитим 28 сыла буолла. Билигин фельшеринэн Ньурбаҕа Дьиикимдэ фельдшерскай пуунугар үлэлии сылдьабын. Төрдүс көлүөнэҕэ Маргарита Михайловна сиэнэ Кривошапкина Алина Владимировна быйыл Дьокуускайдааҕы медицинскэй училищены фельдшер идэтин бүтэрэн Сунтаар улууһугар ананар буолла. Акулина Васильевна үтүө холобур буолан, кэргэнин Егоров Михаил Михайлович бииргэ төрөөбүт бырааттарын оҕолоро, сиэннэрэ, кийииттэрэ эмиэ медик идэтин таланнар үлэлии сылдьаллар. Янкова Александра Михайловна Ньурба Марха сытар балыыһатыгар 32 сыл медицинскэй сиэстэрэнэн үлэлээбитэ. Кини кыыһа Дмитриева Виктория Григорьевна Марха балыыһатыгар медицинскэй сиэстэрэнэн үлэтин саҕалаабыта, билигин Мархаҕа Кэскил оҕо уһуйааныгар медицинскэй сиэстэрэнэн үлэлии сылдьар. Тимофеева Ирина Иннокентьевна Михаил Михайлович балта кыыс медик идэтин талан, бастаан Дьокуускайдааҕы медучилищены бүтэрэн Хорулаҕа фельдшеринэн үлэлээн баран, Дьокуускайдааҕы медицинскэй институту үөрэнэн бүтэрэн, үөрэҕин үрдэттэн, бастаан МИ преподавателинэн үлэлээбитэ. Онтон бочуоттаах сынньалаҥҥа тахсыар дылы Дьокуускай медицинскэй училищеҕа орто үөрэхтээх медицинскэй үлэһиттэр квалификацияларын үрдэтинэр Киин салайааччытынан үлэлээбитэ. Үлэ уонна тыл ветерана, СӨ профсоюзнай хамсааһын ветерана, СӨ дьахталлар хамсааһыннарын ветерана, РСФСР суолталаах персональнай пенсионер, РФ уонна СӨ Доруобуйа харыстабылын туйгуна. Көһө сылдьар молодежнай агитационнай бригада кыттыылааҕа, Хаҥаласс сэбиэтин дьокутаата, КПСС, КПРФ чилиэнэ. ЯГУ МФ уонна
Москватааҕы вирусология институтун сборниктарыгар үс статьята тахсыбыта уонна медицинскай наука кандидатын толорбута.
Төрдүс көлүөнэҕэ сиэн кыргыттар Бурнашева Наталья Владиславовна Дьокуускай куоракка поликлиникаҕа массажиһынан, Антонова Юлия Николаевна Нюрбаҕа сэллиги эмтиир балыыһаҕа медицинскэй сиэстэрэнэн үлэлии сылдьаллар.
Бу курдук өр сыллар тухары Третьяковтар-Егоровтар династиялара дьону-сэргэни эмтииргэ, ыарыыттан харыстааһыҥҥа олохторун анаан ситиһиилээхтик үлэлии сылдьаллар, оҕолоругар идэҕэ бэриниилээх буолуу үтүөкэн холобуру көрдөрөн, өссө да медик идэтин удьуордаан медицинскай династиябыт салҕана туруо диэн эрэнэбин!»
