«Сыдьаай саха»

«Сыдьаай саха»

Бүгүн олунньу ый 15 күнүгэр Ньурбатааҕы көһө сылдьар драматическай тыйаатырыгар төрөөбүт тыл уонна сурук-бичик күнүгэр анаан саха тылын сайдыытыгар дьиэ кэргэҥҥэ аналлаах «Сыдьаай Саха» бэстибээл үөрүүлээхтик арыллан үлэлээтэ.

Тыйаатыр фойетыттан саҕалаан, дьон хайдах таҥнан-хаптан кэлбиттэриттэриттэн көрөн, сыттыын-сымардыын дьиҥ сахалыы эйгэ хас биирдии кэлбит киһиэхэ дьоро күнү бэлэхтээтэ.

Бэстэбээли үөрүүлээх быһыыга-майгыга улууспут баһылыгын солбуйааччы Наталия Семеновна Петрова үөрүүлээхтик тыл этэн арыйда. Салҕыы Култуура Департаменын салайааччыта Розалия Михайловна Тихонова эҕэрдэ тылынан мустубут дьонун алҕаата. Ол кэннэ Дьокуускай куораттан кэлбит ыҥырыылаах ыалдьыппыт "Күөрэгэй" түмсүү төрүттээччитэ Сандаара Кулаковская тахсан билиһиннэрии-эҕэрдэ тылын эттэ. Үөрэҕэрии Департаменын салайааччыта 4 оҕо амарах аҕата - Федор Федорович Ушканов "Оҕолорбутун кытта алтыһыахха, оҕолорбутун сахалыы иитиэххэ" диэн мустан олорооччуларга бэйэтин баҕа санаатын тириэртэ. Ньурбаҕа «Сыдьаай саха» диэн эдэр ийэлэр саҥа түмсүүлэрин салайар Ксения Иванова тахсан эдэр ийэлэрин ыҥыран туран хайдах, Татьяна Александрова көҕүлээһининэн маннык түмсүүнү тэрийбититтэрин туһунан сырдатта.

Онтон салҕыы "Сыдьаай саха" түмсүү кыттыылааҕа Александра Васильева тахсан дьиэ кэргэнинэн оҕолорун сахалыы саҥаҕа сыһыарар санааттаан «Сахалыы таба саҥар» оонньуу толкуйдаабыттарын туһунан сэһэргээтэ.

Кини кэнниттэн Чуукаарга олорор омук тылын учуутала - эдэр ийэ Сардаана Мартынова оҕону сайыннарар сахалыы лэпбук айбытын туһунан кэпсээтэ.

Онтон Егор Миронов оҕолорго анаан "Кэскил мүччүргэннээх сырыылара" диэн айа сылдьар түлүппүөн оонньуутун туһунан үллэһиннэ. Онньуу оҕону сайыннар, төрөөбүт Ньурбабыт туһунан элбэх билиини биэрэр ис тутуллаах. Оонньуу киэҥ эйгэҕэ тахсан Саха сирин туох баар бары оройуоннарын хабарга былааннанар эбит.

«Ромашка» уһуйаан иитээччитэ Татьяна Ивановна Протопопова "Сахалыы остуол оонньуутун нөҥүө оҕо толкуйдуур дьоҕурун саҥарар саҥатын сайыннарыы" диэн бэйэтэ оҥорбут оонньууларын кытары билиһиннэрдэ.

Тэрээһин буола турар кэмигэр Ньурбабыт оройуонун уһуйааннара тохтобула суох бэйэлэрэ оҥорбут оонньууларын оҕолорго, төрөппүттэргэ оонньоттулар. Дьаарханнааҕы куукула тыйаатыра оҕолору эрэ буолбакка улахан дьону эмиэ иһийэн олордон испиктээк көрдөрдө. Ньурбабыт уран тарбахтаах маастардара бэйэлэрин оҥоһуктарын көрдөрдүлэр.

Сахабыт тылын сайдыытын тула кэлбит ыалдьыттарбыт: юрист Сандаара Кулаковская, "Барҕарыы" фонд үлэһитэ Майя Поисеева, сахалыы приложение ааптара Лилия Бэчигэн уонна логопед Валентина Татаеваны кытары аһаҕас кэпсэтии буолла. Кэпсэтии саҕаланыытын улууспут баһылыгын солбуйааччы Валерия Гаврильевна Владимирова дьиэ кэргэнин кытары сахалыы ыллаан киэргэттилэр. Салҕыы эбиэт кэннэ Ньурбатааҕы техническай лицейга тэрээһин салҕанна.

Ити курдук, бүгүн үөрүүлээх быһыыга-майгыга дьиэ кэргэҥҥэ аналлаах сахалыы куттаах "Сыдьаай Саха" бэстэбээл үөрүү-көтүү аргыстанан төрөөбүт тыл уонна сурук-бичик күнүгэр ананна.

Тэрээһин хаартыскаларын Улуус дьаһалтатын ВК официальнай страницатыттан булан көрүөххүтүн сөп.

https://vk.com/album-217094777_305027198

Ньурба улууһун Пресс-сулууспата