Үтүө аатыҥ - үйэлэргэ умнуллубатын!

Үтүө аатыҥ - үйэлэргэ умнуллубатын!

Муус устар 7 күнүгэр, Ньурба оройуонун Дьаһалтатын дьиэтигэр Сергей Иванович Евсеев - аатын үйэтитэр туһунан сүбэ-мунньах буолан ааста.

Сергей Иванович Евсеев - Норуот депутата, 2008 сылтан 2023 сылга диэри Ньурбатааҕы Райсовет бэрэссэдээтэлэ, Ньурба дьиҥнээх, истиҥ патриота, үлэтигэр ирдэбиллээх, принципиальнай, ол эрэн дьон кыhалҕатын чугастык ылынар, төһө кыалларынан күүс-көмө буолар - аламаҕай майгылаах Ньурба киэн туттар салайааччыта этэ.

Мунньах сүрүн тутула:

1. Сергей Ивановичка анаан мемориальнай дуоска оҥоһуллан муус устар 21 күнүгэр - Олохтоох бэйэ салайыныы күнүн кытары тэҥҥэ аттаран, үөрүүлээх быһыыга-майгыга арыллара күүтүллэр.
2. Өйдөбүнньүк-ахтыы кинигэтэ бэчээттэнэн тахсарыгар бэлэмнэнии үлэтэ бара турар. Кинигэҕэ Сергей Иванович олоҕун араас кэмнэригэр бииргэ алтыспыт, үлэлээбит дьонун, аймахтарын, үөлээннээхтэрин ахтыылара, хаартыскалара, дөкүмүөннэрэ тиһиллиэхтэрэ.
3. Төрөөбүт күнүгэр - балаҕан ыйын 6 күнүгэр волейбол күрэҕэ ыытыллара былааннанар.
4. "Ньурба улууһугар биир эмэ уулусса кини аатын иҥэриллэригэр" диэн этии киирбитэ үөрэтиллэр.
5. Ксенофонт Дмитриевич Уткин - Нүһүлгэн аатын сүгэр Ньурбатааҕы Норуоттар доҕордоһууларын түмэлигэр Сергей Ивановичка анаан экспозиция арыллара сыал-сорук быһыытынан туруорулунна.

Кинигэҕэ анаан оҥоһуллубут материалларгытын бэс ыйын 1 күнүгэр диэри: nraysovet@mail.ru ыытаргытын көрдөһөбүт.

Сергей Иванович Евсеев туhунан үтүө өйдөбүл сүрэхпитигэр мэлдьи тыыннаах буолуоҕа.

Ньурба оройуонун Пресс-сулууспата