Кэлэр кэскил кэнии туруо,

Кэлэр кэскил кэнии туруо,
Кэнчээрибит дьолун булуо,
Киэн Ньурбабыт туругуруо,
Куннээх куорат манна буолуо!

Ньукулай Чуор

Бэҕэһээ ытык-мааны киһибит Николай Иванович Харитонов - Ньукулай Чуор 90 сааһын бэлиэтээн «Кыталык» култуура киинигэр литературно-музыкальнай дьоро киэһээ буолан ааста. Тэрээһини илээн-саҕалаан ыыттылар, киэргэттилэр - бэйэтэ тэрийбит айар куттаах «Ньурба уоттара» литературнай түмсүү уонна кини аатын сүгэр "Кыталык" култуура дьиэтин талааннаах үлэһиттэрэ. Дьокуускай куораттан уола Дьулустаан Харитонов кэлэн аҕатын олоҕун туһунан буруоруу сылдьар "Олох умсулҕана" кинигэни кытары билиһиннэрдэ. Ону тэҥэ «ЧУОР ДУУҺАЛААХ ЧУОР БЭЙЭЭККЭ…» «Ньурба уоттара» айар түмсүү Ньукулай Чуорга анабыл хоһооннорун хомуурунньугун оҥорон кэлбит дьоҥҥо барыларыгар бэлэх быһыытынан ууннулар.

Убаастыыр киһибит өтө көрөн, ырыа гынан хаалларбыт хоһуйууларын хас биирдии Ньурба олохтооҕо сүрэҕэр иҥэрэн, дууһатыгар чугастык ылынан аргыс оҥостон илдьэ сылдьар. Ону туоһулаан, Сергей Петров - Уһунча уола хоһуйбут хоһоонун кытары үллэстэбит:

Киэн туттуубут Ньукулай Чуор

Тапталы таба таайан
Чахчытык туойбут убайбыт,
Айылҕаны илэ бааччы ойуулаабыт,
Кэрэ дьикти киһибит
Биһиги киэн туттуубут
Ньукулай Чуор!
Кини хоһоонноро кэпсииллэр
Ааспыт олох таптала сырдыгын,
Чахчы даҕаны ураты уйанын.
Кини суруйуутунан илэ көрөбүн
Оччотооҕу кэрэ кырдалларбын,
Тыллан турар кэрэкий да айылҕабын!
Махтал мааныта буолуохтун
Үйэҕэ биирдэ кэлэн ааспыт,
Ол эрэн сүрэхпитигэр сөҥмүт
Киэн туттар убайбыт - Ньукулай Чуор!

Фоторепортаж Ньурба оройуонун дьаһалтатын ВКонтакте ханаалыгар киирэн көрүҥ:
https://vk.com/album-217094777_306286512

Ньурба улууһун Дьаһалтатын Пресс-сулууспата