️Бүгүн тохсунньу 4 күнэ – суруйааччы, суруналыыс Клара Васильева төрөөбүт күнэ

️Бүгүн тохсунньу 4 күнэ – суруйааччы, суруналыыс Клара Васильева төрөөбүт күнэ

Клара Дмитриевна Васильева баара буоллар 82 ытык сааһын бүгүн тапталлаах Ньурбатын дьонун кытта өрөгөйдөөн көрсө сылдьыа этэ...
Кини 1944 cыллаахха Ньурба оройуонугар Дьаархан нэһилиэгэр Томтор диэн сиргэ төрөөбүтэ. Төрөөбүт улууһугар “Коммунизм суола” хаһыакка өр сылларга корреспонденынан үлэлээбитэ. 1992 сыллаахха суруналыыстар республикатааҕы куонкурустарыгар “Кыһыл көмүс бөрүө” лауреата буолан суруйар-бичийэр идэтигэр олоҕун аныырыгар бигэ төрүөт буолбута.
Кини бастакы “Кучу” диэн кинигэтэ 1985 сыллаахха тахсыбыта. Хоһоонноро, поэмалара “Чолбон” сурунаалга, “Коммунизм суола”, “Ньурба”, “Эдэр коммунист”, “Кыым” хаһыаттарга, “Кырдал кыталыктара”, “Оһуор” диэн хомуурунньуктарга бэчээттэммиттэрэ.
Тыыннааҕар “Кучу” (1985 с.)“Кубалаах күөл” (1993 с.), “Күөх суһум” (1995 с.), “Тэрчи” (1999 с.), “Көмүс кытах” (2003 с.) кинигэлэрин бэлэмнээн дьоҕус кинигэ оҥортоон бар дьонугар бэлэх гынан хаалларбыта. Олоҕун устатын тухары “Ньурба уоттара” түмсүү үлэтин салайсыбыта, Антоновкатааҕы “Кыраһа” түмсүүнү тэрийбитэ, үлэтин сүрүннээбитэ. Элбэх талааннаах дьон литература эйгэтигэр бигэтик үктэнэригэр олук уурбута. Саха сирин суруйааччыларын сойууһугар 1996 сыллаахха киирбитэ. Киин бибилэтиэкэ күүстээх доҕоро Клара Дмитриевна бу орто дойдуттан күрэммитин кэннэ хаһыакка ыстатыыйаларынан “Сүрэх баҕатынан, бэйэ дьулуурунан”, хоһооннорунан “Ыра санаам сыккыстара”, кэпсээннэринэн “Илгэлээх ардах” хомуурунньуктара тахсан төрүт тылбытынан айымньылара саха тыллаах норуот сүппэт-өлбөт сүдү баайа буолар. Хоһоонноро ырыа буолан көтөллөр, кэпсээннэринэн, ыстатыыйаларынан оҕо ыччат төрүт тылын үөрэтэр. Кини айымньыларын ырытыы, үөрэтии өссө да үйэлэри уҥуордаан сахалыы сатарыы туруоҕа!

Киин бибилэтиэкэ ааҕааччыны кытта үлэлиир салаата.