«Киэҥ Ньурба историята үйэлэри уҥуордаан!»

«Киэҥ Ньурба историята үйэлэри уҥуордаан!»

Быйыл биһиги ытыктыыр киһибит, норуотун духуобунай баайын хаҥаппыт, төрөөбүт Ньурбатын кэрэ айылҕатын, дьонун-сэргэтин хомоҕой тылынан хоһуйбут суруйааччы, хоһоонньут, кыраайы үөрэтээччи, успурт бэтэрээнэ, тренер, уон оҕо амарах аҕата, аҕалар бастакы сьиэстэрин (2007 с.) дэлэгээтэ, Күндээдэ, Сүлэ, Ньурбачаан нэһилиэктэрин, Ньурба улууһун бочуоттаах олохтооҕо Ахмед Дмитриев төрөөбүтэ 75 сылын бэлиэтиибит.

Ахмед Андреевич айымньылара — бу саха киһитин олоҕун, кини санаатын-оноотун, кини дьылҕатын кырдьыктаах ойуута. Кини «Үс саха өрөгөйө», «Күөх Ньурба төрүттэрэ» уонна да атын айымньыларыгар биһиги өбүгэлэрбит муударастарын, кинилэр күүстээх санааларын, төрөөбүт дойдуга тапталларын булан ааҕабыт. Кини хоһоонноро — саха киһитин ис дууһатын ырыата, оттон кыраайы үөрэтэр үлэлэрэ — биһиги түөлбэбит историята сурукка тиһиллибит көмүс пуондата. Кини успуорка ситиһиилэрэ, чөл олоҕу тутуһуута эмиэ — бу улахан тулуур, дьулуур уонна модун санаа холобура.

Оттон кини олоҕун улуу айымньыта — бу кини дьиэ кэргэнэ. Уон оҕону күн сирин көрдөрөн, барыларын киһи-хара гынан, үлэһит, үөрэхтээх дьон оҥорон таһаарбыт аҕа — бу ханнык да кинигэтээҕэр дириҥ ис хоһоонноох, үйэлээх айымньы. Кини олоххо таптала, дьулуура, оҕолоругар, сиэннэригэр хаалларбыт үтүө үгэстэрэ үйэлэргэ салҕанан бара туруохтара.

Киһиэхэ
Хаһан да сыыспат,
Хаһан да уостубат,
Уу да ылбат,
Уот да сиэбэт,
Күнүс да
сырдатынар
Тымтыга баар:
Бар дьон
Барҕа махтала –
Бар дьон –
Уйан таптала –
Бар дьон
Ытыктабыла!
Ахмед Дмитриев.

Ааҕааччыларбытын алтынньы 1-10 күнүгэр «Киэҥ Ньурба историята үйэлэри уҥуордаан!» кинигэ быыстапкатыгар ыҥырабыт!

Ф.Г.Сафронов аатынан Ньурба оройуонун киин модельнай библиотекатын ааҕааччыны кытта үлэлиир салаа.