Ньурба сирин киэн туттар суруйааччыта, кыраай историятын үөрэтэн-суруйан биһиэхэ, кэлэр көлүөнэлэргэ үйэтитэн хаалларбыт, сүүһүнэн ахсааннаах оҕо ыччаты саха тылыгар,...

Ньурба сирин киэн туттар суруйааччыта, кыраай историятын үөрэтэн-суруйан биһиэхэ, кэлэр көлүөнэлэргэ үйэтитэн хаалларбыт, сүүһүнэн ахсааннаах оҕо ыччаты саха тылыгар, литературатыгар, тустууга уһуйбут, 10 оҕо аҕата, “Ньурба уоттара” түмсүү бастакы сүһүөҕэр туруутугар үлэтин сүрүннэспит Ахмед Андреевич Дмитриев билигин тыыннааҕа буоллар 75 сааһын биһигиниин, бар дьонунаан бэлиэтии сылдьыа этэ...



Алтынньы 2 күнүгэр Саха Өрөспүүбүлүкэтин суруйааччыларын сойууһун, Дойдулар икки ардыларынааҕы суруйааччылар холбоһуктарын чилиэнэ,поэт, кыраайы үөрэтээччи, “Ньурба уоттара” түмсүү бастакы сүһүөҕүн чилиэнэ, бу түмсүү үлэтин сүрүннэспит АХМЕТ АНДРЕЕВИЧ ДМИТРИЕВ төрөөбүтэ 75 сылыгар ананар декада аһыллыыта Күндээдэ нэһилиэгэр ааста. Бастакы чааһыгар С. Г. Хардарысов аатынан орто оскуолаҕа саха тылын, литературатын учуутала Анжелика Александровна олус иһирэхтик-истиҥник Ахмет Андреевич Дмитриев айымньылаах олоҕун толору арыйар ахтыы түһүлгэтин салайан ыытта. Суруйааччы кэргэнэ, 10 оҕо ийэтэ, медик идэлээх Надежда Петровна, кыыһа Христина Ахметовна, араас кэмҥэ Ахмет Андреевичтыын үлэлээбит, алтыспыт доҕотторо, “Ньурба уоттара” түмсүүттэн СӨ суруйааччыларын Сойууһун чилиэнэ, суруйааччы Айаалла Руслановна Сельтюкова, Альбина Күндээдинскэйэ, Луиза Акимовна Канаева, Сандаара Игоревна Тобонова үөрэтэр оҕолорунаан, киин бибилэтиэкэттэн мин, Маргарита Романовна Ноева, лицейтэн Александра Валерьевна Мясоедова, гимназияттан Туйаара Васильевна Николаева, Августина Аркадьевна Моякунова үөрэнээччилэринээн.

Ахтыы түһүлгэтэ Күндээдэ оскуолатыгар дириэктэринэн саҥа анаммыт Ньурба оройуонугар салайааччы, депутат, общественник быһыытынан күүскэ биллэр педагогика билимин кандидата Иван Дмитриевич Гаврильев мустубут дьоҥҥо-сэргэҕэ, оҕолорго истиҥ махталыттан саҕаланна.

Оскуолаҕа олус тупсаҕай оҥоһуулаах А.А. Дмитриев аатынан кабинет суруйааччы саха омук историята, төрөөбүт төрүт тылбыт, литературабыт үйэлэргэ хааларын туһугар үлэлээбит сүҥкэн үлэлэрин үйэтитэр сыаллаах ситиһиилээхтик үлэлии турара кэрэхситэр.

А.А. Дмитриев үбүлүөйдээх сылыгар анаммыт декада аһыллыытын иккис чааһа С. Н. Эверстова аатынан “Тускул” НАК “Окко түспүт оҥоһуум” диэн поэт хоһооннорунан поэтическай түһүлгэ олус да үчүгэйдик ааста. Бу тэрээһин ааптара, ыытааччыта олус талааннаах Венера Ивановна Степанова бэйэтэ таҥан оҥорбут сценарийынан Күндээдэ оскуолатын учууталлара, үөрэнээччилэрэ, “Кэнчээри” оҕо уһуйаанын үлэһиттэрэ, ыалдьыттартан учууталлар Туйаара Васильевна, Александра Валерьевна, Ньурбатааҕы гимназия 6 уонна 10 кылааһын үөрэнээччилэрэ кыттыыны ылыллар. Ахмет Дмитриев хоһооннорун ураты тыыннаан истээччи өссө да истэ олоруон курдук толордулар.

Кыттааччыларга, ыалдьыттарга күндү бэлэҕинэн Н.Р.Татаринов аатынан “Хомсомуол албан аата” устуоруйаны-кыраайы үөрэтэр түмэл үлэһиттэрэ оҥордулар. Ахмет Андреевич Дмитриев олоҕун, үлэтин кэпсиир хаартыскалартан таҥыллыбыт буклет барыбыт биһирэбилин ылла.

Норуот айымньытын киинин фойетыгар тардыллыбыт быыстапка ис хоһооно дириҥинэн, анабылын толору сырдатарынан холобурга киирэр быыстапка. Олохтоох бибилэтиэкэр Татьяна Аркадьевна суруйааччы бэчээккэ тахсыбыт үлэлэрин сэргэ Ахмет Дмитриев дьиэ кэргэнигэр харалла сытар тус матырыйааллар: суруйааччы тэтэрээттэрэ, оҥорбут папкалара, тутта сылдьыбыт маллара уонна д.а. ким баҕарар болҕомтотун тардар күүстээх быыстапка. Бу быыстапканы алтынньы 10 күнүгэр Ньурбатааҕы киин бибилэтиэкэтигэр киллэрэн туруоруохтара. Бибилэтиэкэбит доҕотторун, ааҕааччыларын бука барыгытын күүтэбит.

Ньурбалар киэн туттар биир дойдулаахпыт, поэт, суруйааччы, кыраайы үөрэтээччи, бөлүһүөк, успуорд, чөл олох пропагандиһа Ахмет Андреевич Дмитриев төрөөбүтэ 75 сылыгар аналлаах тэрээһиннэр: быыстапкалар, дмитриевскэй ааҕыылар, библиотечнай уруоктар, орто сүһүөх уолаттарыгар тустуу күрэҕэ уонна да атын тэрээһиннэр нэһилиэктэринэн, Ньурба куоратынан ыытыллыахтара. Хайаатар да, тэрээһиннэргэ көхтөөхтүк кыттыҥ, суруйааччы, уһуйааччы, кыраайы үөрэтээччи, дойдубут дьиҥнээх патриота Ахмет Андреевич Дмитриев үлэлэрин нөҥүө бэйэҕитигэр саҥаны арыныҥ, диэн ыҥырабыт.



Маргарита Н.,

Ньурбатааҕы киин бибилэтиэкэ кыраайы үөрэтэр салаатын бибилэтиэкэрэ.